Coròngiu: «Su Tuls est una lege trunca-limba sarda»

Dimandas a Pepe Coròngiu

1. Pro ite sa Majoria de tzentru sinistra in Regione est traballende a una lege noa in sa limba. No esistet giai sa lege 26?

Mi creo chi siat una sutacommissione de sa commissione cultura a traballare subra su Testu Ùnicu de sa Limba Sarda. Mi penso chi sa majoria non nd’apat galu faeddadu a manera ampra e ufitziale. E semper e cando ant rinviadu s’esame de unos cantos meses. Est pagu prus de un’initziativa personale. Unu dispetu de su mundu folk contra a cussu Lsc. Deo personalmente penso chi su tzentrumanca non si podet prestare a custa operatzione. Lu diat pagare meda pro sas eletziones. Diat pèrdere unu muntone de votos ponende mente a ideàticos.

2. Cales sunt sos aspetos prus dannosos de tale testu de lege?

Ca ammesturat limba e folklore e neutralizat sa Lsc ponende sas bases pro torrare a cuntzetos comente su campidanesu e logudoresu chi pariant ismentigados. Promitit de gastare unu muntone de dinare pro nudda iscreditende su mundu linguìsticu. Escluit dae s’iscola gadduresu, tataresu e tabarchinu, mentres oe bi sunt. Creat su cuntzetu vagamente ‘etnitzista’ de arte ‘propria’ riferidu a s’autoctonia. Non m’agradat.

3. Ite est sa LSC e chi sunt sos innimigos suos?

Est unu còdighe iscritu pro iscrìere su sardu a livellu ufitziale. Sunt contra sos chi negant e non cherent s’ufitzialidade de sa limba. Finas si faeddant in sardu e sunt indipendentistas. Cherent su sardu pluridialetu e non limba normale. Sunt autocolonizados e italianistas linguìsticos finas si non si nde sapint. Foras de sa Lsc b’est su caos.

Pepe Coròngiu 

4. Sa LSC podet èssere megiorada fintzas iscurtende sas crìticas de chie la refudat?

Apo semper fatu e ascurtadu sas crìticas. Sa Lsc est unu ‘megioru’ de sa LSU e de sa Mesania. Cando fia diretore in Regione aia finantziadu unu progetu gestidu dae un’impresa ispetzializada pro la megiorare. Ma in sa riunione finale unu linguista meda importante aiat postu su vetu. Custa beridade simple simple, iscontzat totu sa còntiga de Corongiu chi no at mai ascurtadu sas crìticas. Coròngiu at fatu su dovere suo e àteros ant contadu fàulas. Si podet megiorare, ma lu podet fàghere una commissione de linguistas ghiada dae unu guvernu sàbiu. Non chie cheret iscontzare totu. Su megioru est un’iscùsia pro la brusiare.

5. A ite diat batire sa doppia standardizzazione de sas gai naradas variantes “campidanesa” e “logudoresa”?

A fàghere sa limba sarda a cantos, a arrogos, a orrugos. A pezzi. Diamus nàrrere a su mundu chi su sardu no esistit. Ma chi esistit unu pluridialetu folk chi costat unu muntone de dinari. Diamus èssere ridìculos in totu su mundu ponende fatu a custa classificatzone acadèmica imbentada e imposta dae professores mandrones chi no ant lèghidu Contini, Bolognesi e Mongili.

6. Sa limba sarda est cundennada a mòrrere?

Si a fàghere egemonia sunt sas sutacommissiones comente cussa de su Tuls, emmo. Si binchet su folklore, emmo. Si colat s’idea acadèmica de su pluridialetu, emmo. Ma nois los amus a firmare. No pasaran.