Atòbios de limba in limba

Bilinguismu in Aristanis sighit sa faina de promovimentu de sa connoschèntzia e de s’impreu de sa limba sarda, comintzada cun su primu cursu de alfabetizatzione in LSC (Limba Sarda Comuna), e proponet chimbe atòbios cun istudiosos e espertos chi ant a faeddare (in limba) de chistiones acapiadas a sa presèntzia de su sardu in is carreras diferentes cunforma a sa cumpetèntzia issoro. Is atòbios sunt abertos a totus, gratis, e s’ant a fàghere in sa Libreria-bistrot LIBRID, in Pratza de Tzitade in Aristanis.

Bos ibetamus pro su de chimbe atòbios.
chenàbura su 16 de freàrgiu 2018 | 17:30 | Antoni Nàtziu Garau 
Su sardu in iscola: normas, atores, ainas e fainas intra de dificultades e isperas
Antoni Nàtziu Garau est operadore in isportellos linguìsticos de s’Amministratzione pùblica, espertu de didàtica de/in limba sarda, tradusidore-intèrprete in sa carrera giurìdicu-amministrativa e giuditziària, condusidore de programmas radiofònicos e televisivos in sardu, sòtziu fundadore e presidente de sa Sotziedade Cooperativa L’ALTRA CULTURA de Aristanis.]