Sa limba sarda ufitziale pro sa Províntzia de su Campidanu de Mesu

De oi est in sa retza su giassu internet  www.limbasardasudsardigna.it
Su giassu internet www.limbasardasudsardigna.it,  fatu cun su dinai integrativu chi po su 2013 sa Regioni Sardigna at postu a dispositzioni po is progetus de avaloramentu e amparu de sa língua sarda, cunformas  sa L.R. 6/2012.art. 2 comma 13, a integratzioni de is risorsas postas a dispositzioni cun sa L.482/99 artt. 9 e 15 “Normas a amparu de is minorias linguísticas stóricas”, fait parti de is interventus a favori de sa prumotzioni bisíbbili de sa língua sarda, sutaposta a amparu.

Su giassu est de unu totu fatu in língua sarda: in sa strutura, in is cuntenutus de is setzionis diferentis e in is boxis e in is elementus puramenti ténnicus.

Custu po dimostrai chi sa língua sarda si podit umperai cun fatzilitadi in cuntestus diferentis, de cussus culturalis e linguísticus a cussus professionalis, ténnicus e de spetzializatzioni tennológica arta, cumenti est oi sa programmatzioni informàtica.

Su giassu torrat a portai totu su camminu fatu fintzas a ora po sa língua sarda de sa Províntzia de su Campidanu de Mesu apustis acummonada, cun sa L.R. 2/2016, in sa prus manna Províntzia de su Sud Sardigna, a sa chi apartenit su giassu, cumenti a Enti e cumenti a territóriu.

Est possíbbili castiai po dónnia annualidadi, a inghitzai de su 2006 fintzas a ocannu, totus is atividadis e is interventus fatus cun unu prospetu de is spesas fatas e rendicontadas, annu po annu, de su dinai arritziu, de is finantziamentu regionalis.

Totus is informatzionis asuba de is atividadis fatas e de is atividadis giai cumentzadas  de is sportellus de língua sarda, de is cursus de formatzioni, aici cumenti a su cuntenutu de is circas culturalis e linguísticas,a  is ainas didàticas etotu ( dispensas de is insenniantis, esertzítzius, ditzionàrius, grammàticas, e aici sighendi) funt a dispositzioni de totus is umperadoris chi podint castiai e umperai po aprofundamentu e po stúdiu unu patrimóniu culturali de importu, postu a dispositzioni de totus.

Su giassu est stétiu fatu  in su respetu de is inditus  nous de ghia  po su sétiu de is giassus de s’Amministratzioni Púbrica svilupadas de s’AgID (Agéntzia po s’Itàlia Digitali), e respetat sa normativa asuba de s’atzessibbilidadi de is giassus “web”, e presentat una strutura de tipologia “responsive”, est a nai chi connoscit su suportu chi innui est abertu (pc, tablet o mobile) e si nci cunformat in manera automàtica diaici de permiti unu gosu de is cuntenutus  craru e de profetu a is umperadoris.

Su progetu in prus est presenti, po médiu de is canalis “social” ufitzialis, in is piataformas “Facebook” e “YouTube”.