Sa Corona De Logu s’at a presentare su 6 de abrile in Casteddu

Sa Corona de Logu, assemblea natzionale de sos amministradores indipendentistas, s’at a presentare sàbadu su 6 de abrile, a sas 5 de merie, in s’Auditòrium de Open Campus Tiscali, in localidade Sa Illetta, in Casteddu.

S’atòbiu, abertu a totus, tenet s’obietivu de ammustrare a su mundu polìticu e a sa sotziedade s’àndala chi at batidu a sa nàschida de sa Corona de Logu, s’organizatzione e sos obietivos suos. Importu at a bènnere dadu a su sìmbulu istitutzionale de s’assemblea e a su programma de atzione polìtica pro su 2019. Programma giai inghitzau cun sas initziativas pro su bilinguismu ordingiadas su 21 de freàrgiu, in ocasione de sa die internatzionale de sa limba mama.

Coro de s’atòbiu at a èssere sa firma de sa Carta Istitutiva de sa Corona de Logu, a incuru de sas deghinas de amministradores locales indipendentistas chi, acudinde dae totu su territòriu natzionale de sa Sardigna, ant dadu animu a s’assemblea. Su fine issoro est, pro mèdiu de sa testimonia personale e su bonu traballu in sas comunidades, ammaniare s’andala a sa nàschida de sa Repùblica de Sardigna.

Su 6 de abrile ant a èssere lèzidos is messàgios lòmpidos dae sos movimentos de sas diferentes natziones sena Istadu de Europa. Unu saludu at a èssere infines batidu dae sos partidos indipendentistas sardos.

Sa Corona de Logu s’augurat una partetzipatzione manna a s’atòbiu e chi, in su benidore, semper prus amministradores locales s’aunant a s’àndala cara a s’emantzipatzione de sos sardos.