Sardware: antigu ses tue!

de Costantino Pala

Sa Limba sarda est istada semper reprimida e minorizada in sos annos colados cun giudìtzios negativos; nande fintzas chi no siat adata a faeddare de cosas de iscientzia e tecnologia. Semus imbattidos a custa situatzione gràtzias a sas polìticas reprimidoras de sos annos colados contra a sas limbas minorizadas ma fintzas a s’impreu, semper prus minore de su sardu, mescamente in cosas de iscientzia e tecnologia. Tocat de s’ammentare chi, fintzas in dies de oe, tocat de intèndere zente nande chi su Sardu est una limba morta.
Arresonandebei unu pagu si podet cumprèndere luego chi totu sas Limbas, pro bìvere, si depent arrichire fraigande peràulas noas o mudande/agiunghinde significados noos a peràulas chi giai esistiant (eg: mouse, souris, ratón, sòrighe pro inditare su “mouse” de s’elaboradore).

Sardware e carchi bortadore indipendente tenent su mèritu de àere bortadu in Sardu carchi aplicu pro prataformas drivessas, pro sos elaboradores e pro sos telefoneddos. Custa est una cosa chi podet fàghere fintzas a rìere calicunu ma est manna ca est faghende a bìvere su Sardu annoande-lu.
Su de bortare un’aplicu in Sardu cheret nàrrere a àere peràulas noas ma fintzas a torrare a imperare peràulas ismentigadas (eg: tecladu pro “keyboard”) e chi podent èssere fintzas prus adatas a inditare una cosa de su currispondente suo italianu.

Cun custas resones amus detzisu de cumbidare in sa Sede nostra Sardware, chi at èssere rapresentada dae Adrià Martín, professore in s’Universidade Autònoma de Bartzellona e in s’Universidade de Casteddu. Issu nos at a chistionare de sa missione de Sardware, comente traballant e sos progetos pro su benidore issoro. Nos at a chistionare fintzas de comente su Cadalanu est imbàtidu a èssere una de sas prus presentes limbas in sos software e sistemas operativos cunfrontande-lu cun su protzessu chi est batinde su Sardu in su mundu de sos Software.

Totu sos detàllios de s’eventu si podent leghere abatigande subra de custu acàpiu